Глас 2.
Песнь 1, ирмос. Грядите, людие, поем песнь Христу Богу, раздельшему море и проведшу люди, яже испусти из работы египетския, яко прославися.
стих: Сердце чисто созижди во мне и дух прав обнови во утробе моей.
Виждь, душе, Христа закалаема на божественней трапезе, и не беседуй окаянная прилежно со други своими, Бога бо прогневаеши, многогрешная.
стих: Не отверзи мене от лица твоего, и Духа твоего святаго не отыми от мене.
На небесех Ангели со страхом предстоят, ты же окаянная без страха стоиши глумящися, видящи Спаса Христа закалаема.
слава: Кая душа видящи, или кий человек зря ныне совершаемых,  Христа закалаема, иерея служаща со страхом,  и не славит раздробляемого.
и ныне: Слово Отчее вселися во утробу твою, Дево Марие чистая, нас обнови воплотивыйся волею и Божественныя плоти причащатися сподоби.

Песнь 3, ирмос. Утверди нас собою, Господи, древом умерщвей прегрешения, и страх твой всади в сердца наша, яко человеколюбец.
стих: Сердце чисто созижди во мне и дух прав обнови во утробе моей.
Сподоби нас Тела твоего причаститися, Спасе, неосужденно, и Крове Твоея честныя, и славити Твою благостыню.
стих: Не отверзи мене от лица твоего, и Духа твоего святаго не отыми от мене.
Вразуми нас в страсе твоем, Спасе наш, божественную службу со страхом многим принести Тебе сподоби.
слава: Проповедник вопиет, повелевая нам всегда в Дом Божий приходити, но потецем ныне, яко время есть.
и ныне: Обожила еси нас божественным ти зачатием Дево, Бога бо прияла еси во чреве заченши, Его же Плоть купно снедаем.

Господи помилуй, трижды

Седален, глас 2
Огнь и свет буди ми, Спасе, приятие пречистых и животворящих Твоих Таин, пожигая духовный плЕвел и просвещая всего ко истинному богословию, не издам бо святыни, вражии льсти предавшися, ни Тебе дам целования лестна, но яко блудница припАдаю Ти, и яко разбойник исповедаяся вопию Ти: помяни мя во царствии Си.
Слава, и ныне: Богородичен:
Божию естеству общницы быхом, тобою, Богородице Дево, Бога бо воплощьшася родила еси нам. Тем же тя по долгу поюще непрестанно величаем.

Песнь 4, ирмос. Пришествовал от Девы не ходатай, ни Ангел, но Ты Сам, Господи, воплощяся, и спасЕ всего мя человека, тем вопию Ти: слава силе Твоей.
стих: Сердце чисто созижди во мне и дух прав обнови во утробе моей.
Станем убо вси со страхом и трепетом, очи сердечныя горЕ имуще, ко Спасу вопиюще: утверди нас и вразуми, Боже щедрый, в страсе твоем.
стих: Не отверзи мене от лица твоего, и Духа твоего святаго не отыми от мене.
Царь всех происходит, освящая всех нас входом своим, яко милосерд. Ты же видящи Его, о душе моя, не восхлащАешися (обуздываешься) страхом, глаголющи неподобная. 
слава: ГорЕ имеем сердца, дольняя возненавидевше, идеже и житие наше есть. Вси дОлжни есмы тако жити, а не яко змия поползатися по земли
и ныне: Лоза, иже Грозд божественный прозябший без семени, ты бысть, Дево Мати Богоневестная, и души возвеселила еси, благочестно Богородицу тя исповедающих

Песнь 5, ирмос. Света Подателю и веком Творче, во свете твоих повелений настави нас, разве бо Тебе иного Бога не знаем.
стих: Сердце чисто созижди во мне и дух прав обнови во утробе моей.
Священник, братие, выю приклоняет, за ны молитися, мы же стояще прелагаемся умом к терновным житейским печалем.
стих: Не отверзи мене от лица твоего, и Духа твоего святаго не отыми от мене.
Преосквернену душу мою и устне мои имый нечисте, Господи, ныне же како смею приближатися к Тебе, и прияти Тело Твое, но Ты яви мя достойна.
слава: Рцы, о человече, бисер пресветлый прияти хотя, стоиши присно и смеешися, и твориши. яже на гнев Бога подвизают, и како хощеши к нему приступити.
и ныне: Во плотнем чреве естеством Бесплотнаго понесла еси, паче естества от тебе воплощьшася ,Пренепорочная, и Божественныя Его Плоти нас причащатися сподоби.

Песнь 6, ирмос. В бездне греховней одержим, неизследную милосердия Твоего призываю бездну, от тли, Боже, мя возведи.
стих: Сердце чисто созижди во мне и дух прав обнови во утробе моей.
Царю смертному и властем со страхом предстоим. Зде же, братие, стояще, не боимся, видяще всеми Владущаго.
стих: Не отверзи мене от лица твоего, и Духа твоего святаго не отыми от мене.
Сон и прах еси, о человече, трава и сень, что убо возносишися? Но во гроб приникнув, виждь своего образа красоту и плачишися.
слава: Со страхом и трепетом пристУпим вси к Божественным Тайнам Христовым, истое и святое Тело Его приимем, истую и святую и честную Кровь.
и ныне: Сень святая, ты явися, Владычице Пренепорочная, в тебе бо воплощься Бог и явися, якоже и плоть свою мирови дал есть.

Господи помилуй, трижды

Слава, и ныне: Кондак, глас 6:
Вечери Твоей тайней днесь, Сыне Божий, причастника мя приими, не повем бо врагом твоим Тайны Твоея, ни лобзания Ти дам, яко Июда, но яко разбойник исповедаяся вопию Ти: помяни мя, Господи, во Цартсвии Твоем.
Икос:
Во светлостех святых Твоих како вниду недостойный? Аще бо дерзну внити в чертог, одеяние мя обличает, яко несть брачно, и истязан буду и изгнан от Ангел. Очисти, Господи, скверну души моея и спаси мя, яко человеколюбец.

Песнь 7, ирмос. Богопротивное веление беззаконнующа мучителя высок пламень вознесло есть.  Христос же простер богочестивым детем хлад духовный, сый благословен и препрославлен.
стих: Сердце чисто созижди во мне и дух прав обнови во утробе моей.
Стояще и воспевающе Господеви с верою поучатися и вопити весь день правду твою, Господи. Оставльше же лжу ныне всю, обретаемся не творяще яже поем.
стих: Не отверзи мене от лица твоего, и Духа твоего святаго не отыми от мене.
Рцы, о человече, яже обещася к Богу, исповедав в Дому Святыни, того ради убойся, како не сохрани! или мнишися окаянне, тленну человеку сия исповедав?
слава: Душе моя окаянная, душе страстная, ужаснися, зрящи Таинства преславная, и воздыхающи прослезися, в перси биюще, зовуще и глаголющи: Боже, очисти мя якоже и блуднаго.
и ныне: Прияла еси во утробе своей, Мати Дево, Слово собезначальное Отчее, и воплотися, якоже Сам изволи. Вся ны сподоби, Владычице, Плоти Его причащатися, Богорадованная.

Песнь 8, ирмос. В пещь огненну к детем еврейским сшедшего и пламень на хлад преложьшаго Бога, пойте дела вся дела Господа и превозносите Его во веки.
стих: Сердце чисто созижди во мне и дух прав обнови во утробе моей.
Отца взываеши и вопиеши, предстоящи, душе, Всевидцу, и никакоже исполняющи повеление его преподобно. Прилежно, окаянная, смотри, яже глаголеши, да не осудишися.
стих: Не отверзи мене от лица твоего, и Духа твоего святаго не отыми от мене.
Господь заповедает нам и учИт, братие, яве: всегда поучатися, и боятися присно смерти, и с верою Пречистое Тело Его и Кровь приимати во веки вся.
слава: Истязующему утробы и сердца истинно испытающему, како смеем глаголати: "остави нам, Боже, о них же ти должни есмы", имуще ненависть к братиям своим.
и ныне: Божественный Хлеб жизни в чреве твоем, Богомати, истинно испечеся, сохранив невредно ложесна твоя, Пренепорочная. Тем же яко питательницу нашу поем тя во вся веки.

Песнь 9, ирмос. Безначальна Родителя Сын - Бог и Господь, воплощься от Девицы, нам явися, омраченныя просветити и собрати расточенныя, тем всехвальную Богородицу величаем.
стих: Сердце чисто созижди во мне и дух прав обнови во утробе моей.
Освяти, Владыко, наш ум, яко милосерд, и души и телеса пришествием Твоим ныне, Пречистаго Тела Твоего, Слове, и Крове Божественныя, да тя прославляем и непрестанно величаем.
стих: Не отверзи мене от лица твоего, и Духа твоего святаго не отыми от мене.
Сподоби мя, Господи, божественное тело твое и честную кровь рукама и устнама скверныма прияти ныне, Спасе мой, и что убо принесу, Владыко, многому долготерпению Твоему.
слава: Освяти, Господи, и вразуми и утверди сердца, иже верою Божественное Тело Твое и Честную Кровь приемлющих со страхом, покажи исполнителя словес Твоих, и сыны Царствия Твоего.
и ныне: Бога безплотнаго во чреве своем вмещьши, Того родила еси сугуба естеством, и истаявшее жаждею греховною, естество наше, Мати Чистая, святыни насытила еси, Владычице, тем же величаем Рожество твое, Всепетая!